L’LEU EIÉT L’CIGOGNE.
In coup l’bourguèmaite dé l’Ville-Basse,
Donnét in grand dînner, pou l’dimégne dé l’ducasse !
Quand îl ont ieu bouffét, on rascout les ochats.
Pou lés tappé su l’rue ét dé fai in monchat.
In Leu vint sucté d’dain avét n’foim d’tous lés dîabes,
— « V’la n’râle fristouye, disti, mettons rade vinte à tabe !
L’à d’sus comme in galaffe, in goulu qu’il estét,
I strannét sain machi, tous lés pu gros bouquéts,
Mai v’là comme i mougnét habie,
I l’liaroque dain s’gohii, in ochat, comme enne ghie !
C’estét l’sin d’in bouli ;
Mai l’pu foutant pour li : c’ést qui n’s’avét crii !
In janpotage ou l’aute aurét bin fai s’naffaire,
Ou, in aracheu d’dints, t’taussi adoèt q’Prospère,
Mai i n’p’lét né seulemin,
Pou li quai iun ou l’aute, crii aprét l’gamin.
Co bin ascheû pour li, i voét passé n’Cigogne,
Avét s’bet’che copu long qué n’saucisse dé Boulogne !
Elle d’allét au raclot d’Gillii !
I fai signe avét s’patte, elle lé voét, eiét rade,
Elle desquin au galop pou sogni m’camarade !
I drouve ess’geue au l’auche, i li mousse ess’gohii.
Su l’tins qui s’desbat quî s’coutrouye,
Elle woête dain l’trau avét deux ouyes,
Copu claîre qué lés sin din chat,
Elle s’eva radmoin r’quai l’ochat !
Mai quand elle a ieu fai, elle a v’lu iesse payie,
L’Leu l’woète à coène in d’sant : « Bin vo riét n’do m’fie !
« Bin vo radodinet ! pasqué comme jél’intins,
« Vo d’vri iesse bin contenne
« Qué j’vo z’ai l’lii r’satchi vo tiesse haure dé mes dints !
« Mai c’nest rin ! woétet bin, dé n’né r’chaire dain mes moins !
« Pasqué, vo s’attraprii enne fameuse rigodenne,
« Contét q’vo passri mau vo tins !
— Là d’su l’Cigogne, enn’n’lia né d’mindét s’resse,
— Elle a rade foutu l’camp, in rastrindant sés fesses.
Vo voeyét bin Colas, qui n’faut né obligi,
Lés geins qui n’ont né d’keure ! vô z’auri bia rattinte,
I n’vo l’l’ervauront né ! mai si l’momint s’présinte,
I n’manq’ront né leû coup pou vo fai inragi.