Mélin
Viladje di mès parints,
Viladje di d’ quand dj’ èsteû gamin.
A dj’ djamblé su vos pavéyes !
A dj’ bèrôlé dins vos foncias !
Al nîve, au solia, su vos-ûréyes !
Mélin.
Ô, m’ bia p’tit viladje !
Quates pitits amias
Covés pa d’zo nosse blanc clotchî
Qui pwate si coq jusqu’aus nûléyes.
A dj’ vèyu ?
Nos stindéyes di vèt’, au mwès d’ maîy,
Nos pachis cafloris, avou l’ bon timps,
Nos stindéyes di scaugnes d’oûs d’ l’èsté.
Nos pawas dins lès chavéyes.
A dj’ sintu ?
Lès fornéyes di pwins cûjant dins lès fors ;
Lès vènéyes èmacraler mès traus d’ nez :
Si ça sint li stauve, c’èst là qu’on vike ;
Li nwêr di pouchêre, c’èst qu’on bat lès dinréyes.
A dj’ ètindu ?
Lès ritchitchi-batisse-cowitches,
Lès coqs tchanter à mèseure avou l’èclume do mârchau,
Lès tchins bawyî après lès tch’faus,
L’anjélus qui sone prandjêre !
A dj’ sayî ?
Lès bonbons di r’naud dins lès spènes,
Lès sucrés r’djètadjes su lès sprautes,
Lès poumes cûtes dins l’ covèt.
Lès scafiotes di nosse gayî.
Viladje di nos cinsîs
R’lèvés avou l’ solia,
Boutant jusqu’al vièspréye,
Su leûs têres, su leûs pîces.
Ardents dins leûs fîves,
Au solia, al plouve, al nîve.
Li cia qu’a polu sokter on quârt avou zèls,
Stindu dins one môye di foûre,
Ni vos rovîyerè jamaîs pus !
Viladje di nos tayeûs d’ pîre !
A dj’ ètindu lès sclats
Pèter pa d’zo vos masses !
Avoz vèyu nos blankès pîres
Tayîyes avou leûs chasses ?
Avoz vèyu nos blankès pîres
Qui rabrèssenut nos-intréyes,
Qui moussenut nos fènièsses,
Qui sopwatenut nos maujones ?
Avoz vèyu nos blankès pîres ?…
A dj’ choûté nos vîs parints,
Al chîje, su l’ pîre di l’ uch
Au timps dès baloûjes !
A dj’ choûté nos vîs parints
Nos raconter dès furdin.nes
Au r’cwè, dins l’ culot !
Combin d’ côps nos-ont-i
Trin.né su nos sclides d’èfants,
Dins nos pus bias moussemints,
Su l’ vôye dèl mèsse di méyenût !…
Dès djoûs, dès mwès… dès-ans !
Qui dji m’ pormin.ne au lon,
Sins wêre di bon !
Dès djoûs, dès mwès… dès-ans !
Qui dj’ a mès niêrs ;
On coûr di fiêr !…
Vêroz avou mi à Mélin,
Po-z-i r’trover l’ gout d’ nosse pwin ?
Po-z-i r’ssayî l’ tchaleûr di nos djins ?
Nos-è mète plin nos-ouys, plin nos mwins…
Po fé frumjî nosse song,
Po ratraper nosse tièsse !…
Li djoû qu’ nos-èrirans,
Nos r’pudrans nos sclides d’èfants !…